بعيدا عن لبس البنطلون

احتفلت النهاردة بمرور 4 شهور بعيدا عن لبس بنطلون، بس الصراحة الاحتفال كان القشرة الخارجية للموضوع الحقيقي وهو اني اكتشفت أني مدمنة للتفاصيل المرتبطة باشخاص أو أشياء في حياتي.

فمثلا التغيير للبس الجيبات والفساتين مش أزمة في حد ذاته -وبعيدا عن الجانب الديني للموضوع- على اد ما الأزمة في تعلقي بتفاصيل في حركتي ويومي اتعودت عليها وبقيت بعملها بدون وعي وأنا لابسة البنطلون.

ومثلا كان أحد أسباب توقيف حساب الفيسبوك بتاعي فترة أسبوعين تقريبا الشهر اللي فات هو برضه ادماني للتفاصيل اللي كنت بعملها عليه وازاي يومي كان بيترتب حواليه. فالنهاردة اخدت بالي ان فترة استخدامي للفيسبوك خلال شهر أكتوبر بالكامل كانت مجرد كام ساعة، بدخل نص ساعة أو ساعة بالكثير كل كام يوم وخلاص.

في المطلق التغييرات دي تبان بسيطة وهادئة بس بالنسبة لي التحدي فيها كان في إقناع نفسي إني اقدر اتعايش مع تفاصيل مختلفة. الغريب بقي إن رغم التفاصيل المرتبطة باللبس أو الفيسبوك كانت فعلا تفاصيل صغيرة لكن خلقت عندي حالة من الإدراك بحاجات كانت غير ملحوظة بالنسبة لي زي اني لا إراديا عادة باثني رجلي تحتي لما بقعد على أي كنبة أو رتم مشيتي في الشارع أو إن التقليب في صفحات الفيسبوك المختلفة كانت طريقتي عشان أهدي أعصابي قبل ما أنام ومرحلة انتقالية خفيفة لعقلي عشان ينتقل من عالم الأحلام للعالم الواقعي الصبح.

ده برضه خلاني اخد بالى ان تعلقي بالأشخاص الموجودين في حياتي هو تعلق بالتفاصيل الموجودة بيننا أكثر منه تعلق بالأشخاص نفسهم، واكتشفت إني أحيانا بختزل كيان بعض الأشخاص في تفاصيل علاقتنا أكثر من صفاتهم الشخصية.

مع إن وجود كلمة تغيير في جملة واحدة مع أي حاجة مرتبطة بي قادر يسبب لي حالة قلق وفزع لفترة طويلة، فأنا مدينة لشهر أكتوبر إنه خلاني أكتشف إن مهما كانت التفاصيل مهمة وحياتنا مش بتبقى حلوة من غيرها لكن الأيام هتعدي ودايما فيه بدائل تشغلنا عن التركيز في اللي اتغير.