كل واحد مننا عنده احلام كثير .. منها احلام تحقيقها معتمدة عليه هو بس و منها احلام معتمدة علي ناس معاه.
انا بقي حياتي نصها احلام .. منها اللي بحاول احققه و منها اللي عاملة نفسي ناسياه و منها اللي عارفة انه هيفضل حلم عشان متعلق بناس مش موجودين دلوقتي.
من سنة تقريبا كنت بدات افقد الأمل في كام حلم كده. بدات أقول مش مهم يتحققوا و محدش بيموت لما ميحققش حلمه. المهم ان الواحد عايش كويس و مبسوط بحياته كده و خلاص. فقررت اني أنساها.
خلال السنة دي بقي شفت من القصص و الحواديت اللي تخليني أٌقول اني كنت غلط. ربنا خلاني أعرف قصص ناس عايشة معانا أو كانت عايشة معانا. ربنا خلاني أقابل ناس اثبتوا لي ان سعادتي في احلامي اللي كنت قررت انساها.
و قابلت ناس قالوا دي احلام و محدش بيعيش علي الأحلام، خليكي واقعية و ارضي باللي في ايدك و انسي احلامك. ما محدش ضامن بكرة فيه ايه و شوفي كام واحد قبلك حاولوا و فشلوا و ندموا انهم حاولوا. ركزي علي اللي في ايدك دلوقتي و بس.
و بناءا علي كل ده، فأنا قررت اني مش هتنازل عن أحلامي عشان غيري شايفها كماليات و ينفع نعيش من غيرها. صحيح غيري عايش من غير أحلامه و حياته ماشية بس أنا مش غيري. أنا سعادتي في أحلامي و هفضل أدور عليها و أحاول أحققها مهما أتاخرت.
حلمك جزء من قلبك و عقلك .. لو تعرف تعيش من غير قلب و عقل يبقي ممكن تعرف تعيش من غير حلمك. صحيح ان حلمك ممكن تحقيقه يتأخر او تتعب و انت بتحاول تلاقيه و تحققه. بس الأكيد ان طالما انت متأكد ان سعادتك في حلمك، مش هتعرف تبقي سعيد من غيره.
خليك ورا حلمك لحد ما يتحقق مهما اتأخر .. حياتك مش واقفة من غيره بس عمرها ما هتكمل غير به. خليك في طريقك و ارضي بحياتك و اللي ربنا رزقك به في حياتك و املا حياتك بانجازات كثير تسعدك لحد ما حلمك يتحقق بس اوعي في يوم تسيب حلمك و تمشي.
No comments:
Post a Comment